Yakkasaroy tumanida piyodalar xavfsizligini ta’minlash masalasi deputatlik so‘rovi orqali ko‘tarildi

🏛 Xalq deputatlari Toshkent shahar Kengashi deputati Vasila Alimova tomonidan Toshkent shahar IIBB Yo‘l harakati xavfsizligi boshqarmasi boshlig‘i M.Adilov nomiga deputatlik so‘rovi yuborildi.

📝 Mazkur deputatlik so‘rovi Yakkasaroy tumani “Muqimiy” mahalla fuqarolar yig‘ini aholisi tomonidan bildirilgan murojaatlar asosida shakllantirilgan. Aholi murojaatlarida fuqarolar xavfsizligini ta’minlash, ayniqsa piyodalar uchun qulay va xavfsiz sharoit yaratish zarurligi ta’kidlangan.

📍 O‘rganishlar davomida “Muqimiy” MFY hududidagi Saddi Sirojiddinova ko‘chasida joylashgan Jome’ masjidi oldida, shuningdek Saddi Sirojiddinova va Komil Yashin ko‘chalari kesishmasida piyodalar harakati yuqori ekani hamda ushbu hududlarda yo‘l-transport hodisalari yuzaga kelish ehtimoli mavjudligi qayd etilgan.

🔎 Shu munosabat bilan deputatlik so‘rovida mazkur hududlarda piyodalar o‘tish yo‘laklarini belgilovchi 1.14.1 va 1.14.2 yo‘l chiziqlarini chizish, shuningdek piyodalar o‘tish joylarini ko‘rsatuvchi 5.16.1 va 5.16.2 yo‘l belgilarini o‘rnatish orqali aholi uchun xavfsiz muhit yaratish masalasini o‘rganib chiqish so‘ralgan.

🗣 Deputatlik so‘rovida ko‘tarilgan masalalar yuzasidan tegishli tashkilot tomonidan o‘rganish o‘tkazilib, amalga oshiriladigan ishlar hamda ularning natijalari bo‘yicha 10 kun muddatda asoslantirilgan ma’lumot taqdim etish talabi qo‘yildi. Mazkur masalalar deputat tomonidan nazoratga olingan.